網民「熱捧」譚耀宗香囊 拮大頭針兼貼符
[2016.02.13] 發表
【明報專訊】新年新氣象，民建聯立法會議員譚耀宗今年就搞搞新意思，派紅色香囊吊飾畀街坊，上面繡咗「民建聯立法會議員」、「譚耀宗」同辦事處電話，方便街坊聯絡佢。譚耀宗同Emily講，吊飾造型係件衫，代表豐衣足食，又話過年想送啲福氣畀大家，畀街坊當小飾物。
不過，有網民話香囊造型好似針線包，「忍唔住，即刻用」，搵大頭針刺落個名度，有人仲加多道符，呢啲相之後喺網上瘋傳，個個網民都話好想要，問邊度有得攞！
譚﹕科學時代 冇意思
眼見咁多人都想用針刺落自己個名度，更有網民話似「落降頭」，譚耀宗氣定神閒話﹕「搞埋啲咁嘅嘢，𠵱家科學時代啦……做埋啲冇意思嘅嘢。」
更多港聞
相關新聞
