政改人權議題無影 泛民﹕不如唔好要政制局

政改人權議題無影泛民﹕不如唔好要政制局

[2016.01.19] 發表

【明報專訊】《施政報告》上星期公布後，各政策局官員陸續到立法會，講吓有關佢哋嘅政策工作。政制及內地事務局長譚志源噚日出席政制事務委員會，就被民主派議員質疑，既然政府任內唔會再推政改，施政報告又無咩着墨人權議題，不如索性唔好要呢個局咁話。

民主黨單仲偕、劉慧卿都先後問，政府究竟會唔會喺任內研究、諮詢吓2020年立法會選舉組成嘅問題，譚志源話本屆政府唔會啟動政改，相信下屆政府有足夠時間處理咁話。

毓民：政府內地辦「食塞米」

無黨派嘅黃毓民狠批，李波事件反映政府嘅內地辦事處係「食塞米」，完全做唔到事，政制局負責推廣《基本法》，但成績如何大家心知肚明，批評如果政策局只係負責未來幾場選舉，其實大可直接交由選舉事務處負責，政制局係唔需要存在。人民力量陳志全亦加把口，話施政報告對人權、性小眾議題隻字不提，認為性傾向歧視條例有爭議，政府就應該做諮詢收窄分歧咁話。

至於建制派，亦有唔少議員關注政府推廣基本法、一國兩制嘅成效，似乎都唔係好滿意港人對基本法嘅認知。譚志源就話當局會就特別議題做重點、密集式推廣。

泛民咁唔滿意政制局工作，相信財政預算案時，亦會有人提出修訂，要求刪減呢個局嘅預算。

更多港聞