怪醫問CY：無一地兩檢 仲有無效益？

怪醫問CY：無一地兩檢仲有無效益？

[2016.01.15] 發表

【明報專訊】人稱「怪醫」嘅醫學界立法會議員梁家騮(圖)，平時行蹤飄忽，喺立法會出席率低，佢噚日喺答問大會上發問，就令大家跌眼鏡，皆因佢發問嘅唔係關於業界，好似醫委會改革呀咁，反而跟進高鐵成本效益同埋一地兩檢問題，仲問得好清晰同精警𠻹。

怪醫話，當年立法會審議高鐵撥款，佢基於民意，以及當時計算成本效益，都係用「兩地兩檢」去計算，所以投支持票；但今日環境變化，而政府又話如果無一地兩檢，似乎就無乜着數，佢問特首如果無一地兩檢，高鐵係咪都可以有經濟效益呢？

特首梁振英(CY)就強調，一地兩檢經濟效益一定比兩地兩檢好，但就無回應咁究竟唔行一地兩檢，高鐵仲有無經濟效益。怪醫於是更清晰追問，「若果無一地兩檢，還有無效益？」佢又話如果真係有效益，咁係可將撥款申請同一地兩檢問題分開處理。CY就話兩地兩檢目前嚟講係「假設性問題」，因為有信心喺《基本法》下做到一地兩檢喎。

另一個估唔到嘅議員就係新民黨田北辰，佢同泛民、勞工界一樣，向CY「追數」，批評佢無落實選舉政綱，但講嘅係香港「必須重視英語水平」呢個承諾，批評特首公布4次施政報告，但無一次提及呢個問題。田二少又關注小學生TSA問題。

CY就重申，施政報告唔提，唔等於唔重視喎。講到TSA，CY透露自己都有問教育局拎小三TSA試卷睇，又話用咗600幾蚊搵人去買坊間試題，知道坊間嘅練習，同正式考卷係差一兩級程度。

更多港聞