【明報專訊】版權條例鬧得滿城風雨，噚日特首梁振英(CY)喺facebook話，招待咗十幾個小學生去禮賓府玩，佢就用日前喺工展會買嘅Hello Kitty馬拉糕同流沙包招呼佢哋，結果又引發大量網民質疑，CY上載Hello Kitty包嘅相，究竟係咪侵權呢？ Emily同事請教資深大律師湯家驊，佢話CY上載呢啲包嘅相，表面上無侵權，佢理解Hello Kitty係「註冊商標」而非「版權」。至於「商標」，佢舉例話如果利用有關「商標」賣手袋等，就有可能侵犯商標，認為CY「表面上唔係侵犯商標，也無侵犯版權」。 招待小朋友食包 同EQ齊保育 咁究竟CY招待嘅係咩小朋友呢？CY噚日就喺fb上載另外一堆相片，原來呢班小朋友係民建聯葛珮帆(EQ)安排。CY聽佢哋講聖誕節願望，佢話小朋友除咗講學業，每個都有講希望停止象牙買賣，保護大象。CY話香港法規的確未能杜絕象牙非法交易，佢承諾會認真檢討法例，又同班小朋友講巴黎氣候協議，希望小朋友身體力行減少用電喎。 仲記得EQ黨友黃定光早前公開批評EQ成日掛住保護大象，「救到大象但救唔到自己(輸區選)」，呢番批評無損EQ嘅決心，佢今次仲推動特首一齊做。有政界人士笑言，唔知CY同EQ一齊救大象，兩年後特首選舉又救唔救到自己呢？
|
| |
| |
;){kind=small}
;){kind=small}
