【明報專訊】近排香港天氣忽冷忽熱，一個唔覺意好容易就會病。好似律政司長袁國強咁，唔知係咪因為高鐵「一地兩檢」嘅問題搞到好頭痕，又或者之前上北京天寒地凍冷親，原本噚日佢要出席「2015十大港聞選舉」記招做主禮嘉賓，點知大會突然間話袁司長病咗，所以唔能夠現身喇。 Emily噚日問過律政司發言人，證實袁司長身體抱恙所以無返工，不過大家唔使擔心，發言人話袁司長只係「一般嘅抱恙」，唔係有咩大病，但暫時未知佢今日返唔返到工喇。睇番之前啲報道，袁司長呢排身子好似都係麻麻，10月1日嘅升旗同酒會，佢都因病缺席。 記得袁司長同Emily講過佢都幾怕凍，雖然香港「這個冬天不太冷」，但司長都係著多件衫好，祝佢早日康復。
|
| |
| |
