政府九大焦點選區名單出爐

[2015.11.20] 發表

【明報專訊】仲有兩日就係區選投票日，除咗傳媒緊鑼密鼓做足準備功夫，打算派人手到各重點選區守候最新結果，連政府新聞處都「排兵佈陣」，安排新聞主任坐鎮各區，協助記者採訪。全港495個票站，新聞處當然無咁多人手兼顧，政府內部就研究出焦點選區名單，預計傳媒會喺九大選區集中採訪。

榜上有名嘅當然有立法會議員參選嘅選區，好似民協馮檢基嘅深水埗麗閣，佢面對工聯會小花陳穎欣及前黨友黃仲棋夾擊，大家都好關注。估唔到大家預咗贏梗嘅民建聯主席李慧琼，同樣被列為焦點區，唔知同佢對手係有奇女子之稱嘅林依麗，以及傘兵沈泰鋒有無關呢。

麗閣龍星利東二入圍

另有兩個選區候選人並非立法會政治明星，同樣獲新聞處特別關照，包括利東二選區嘅民主黨副主席羅健熙，佢今年遭民建聯彭兆基、熱血公民蔡文龍及獨立鄧嘉樂挑戰。黃大仙龍星選區嘅港姐男友林作同樣上榜，今屆挑戰人力譚香文，近日都有唔少新聞，亦成功令新聞處關注。同區仲有何偉權及岳敬寬參選。

選管會周日會喺全港設495個投票站，開放時間由上午7點半至晚上10點半。市民如有查詢，可致電選舉熱線2891 1001，或登上網站www.elections.gov.hk了解投票詳情。

更多港聞