署理食衛局長 陳肇始負傷上立會

[2015.10.17] 發表

【明報專訊】立法會大會噚日辯論食水含鉛事件，署理食物及衛生局長陳肇始(Sophia)以「獨臂俠」造型亮相，代表食衛局報告驗血進度。完咗大會，Emily同行家都上前關心佢做咩「負傷上陣」，Sophia話，佢早前做gym嗰陣整親，搞到右手虎口位關節骨裂。

傷得咁嚴重，唔通佢係練舉啞鈴？Sophia話，其實佢只係做蹲上蹲下嘅肌肉訓練，一時失平衡。佢又話，自己第一次喺無教練帶住之下做呢套動作，點知唔小心受傷。雖然整親，副局仲堅持去立法會解答議員質詢，認真夠搏命。

不過骨裂唔係小事，一時三刻好唔番，Sophia話，要5個禮拜時間先可以拆繃帶，睇來佢個特別造型仲要維持多一陣。佢多次感謝大家關心，Emily都希望佢可以盡早康復。

更多港聞

【明報專訊】歷史悠久嘅維也納兒童合唱團上星期來港開咗兩場音樂會，音樂會前夕、上周五（10月9日）率先到政務司長官邸，為維也納兒童合唱團音樂學... 詳情