【明報專訊】呢期唔少人對港鐵有意見，而港鐵喺網民計劃抗議前，噚晚突然間公布，話正檢討乘客攜帶物件尺寸嘅規定，「檢討時會考慮乘客的合理需要、對其他乘客的影響和安全因素」，所以邀請大家提出意見，並可於10月13日或之前，將意見電郵至特別設立嘅地址﹕review@mtr.com.hk或傳真至2795 9991。港鐵仲話，收集意見後，會盡快完成檢討和公布結果。 阿涂轟港鐵附例大權 促檢討 近排港鐵真係多新聞，好似有個後生仔喺港鐵站外圍自彈自唱時，畀港鐵職員叫佢離開「港鐵範圍」，以及港鐵職員阻止學生帶大型樂器搭車，都引起大爭議，有網民仲話禮拜六一齊帶樂器去港鐵抗議。民主黨立法會議員涂謹申(阿涂)亦對港鐵表現好唔滿意，噚日同Emily講，𠵱家嘅《香港鐵路附例》畀咗港鐵過大權力，亦有好多條目定義不清。阿涂仲翻舊帳，指2007年兩鐵合併時，政府答應過會檢討附例，結果「走數」不了了之。 阿涂舉例，附例講到市民「衣著不恰當」就會被拒絕進入港鐵範圍，但究竟咩係不恰當，係咪有地盤師傅辛苦完一日、但沾咗啲污漬就無得上車呢？佢又話原來喺港鐵範圍講粗口，即使對方唔係鬧你，但你聽到後都可以向港鐵投訴，港鐵就可以出傳票罰款。阿涂就形容「地下(鐵)仲嚴過地面」，要求政府「找數」檢討附例。
|
| |
| |
;){kind=small}
