【明報專訊】香港大學校委會成員盧寵茂前晚喺港大學生闖入校委會會議場地後，突然倒地手抱右膝，最後要坐白車去醫院。不過，有網民覺得佢係做戲「插水」，仲觸發大量改圖出現，連幸福醫藥都喺facebook專頁抽水抽埋一份，出咗一張盧寵茂倒地嘅改圖，宣傳「特強幸福止痛素」，仲話「無論真痛定假病都work架」。點知幸福醫藥呢個抽水帖推出唔夠1個鐘就刪咗，仲發聲明話帖子引起部分讀者不安，極度遺憾。

幸福醫藥﹕帖子引起不安 極遺憾

原本個抽水帖都算勵志，話人生少不免會遇到挫折，但跌到(倒)唔等於失敗，最緊要識企番起身。不過可能公司覺得過火，結果要出聲明強調冇對任何人有不尊重嘅意思，「為顧及一眾支持本公司的顧客感受，故已將該帖子刪除」。

其他改圖就包括將盧寵茂倒地照放入足球賽畫面中，有人就將佢同Michael Jackson跳舞相連埋一齊，亦有人將呢個造型放咗落《男兒當入樽》漫畫場景內，盧醫生頓時變咗傷咗腳嘅三井壽。