【明報專訊】海洋公園噚日同雌性大熊貓佳佳慶祝37歲生日，佢比起第二年長、36歲10個月嘅已故武漢熊貓「都都」大兩個月。Emily聽講熊貓37歲等於人類110歲，佳佳仲拎咗兩項健力士世界紀錄，包括「迄今為止最長壽的圈養大熊貓」、「最長壽的在世圈養大熊貓」，絕對係「大熊貓瑞」，噚日政務司長林鄭月娥、食物及衛生局長高永文就去咗同佳佳慶祝。

佳佳作為「老友記」，都有關節炎同白內障毛病，但無阻佢去玩最鍾意嘅玩具﹕麻包袋。佳佳訓練員每日會準備唔同氣味嘅麻包袋吸引佳佳，希望佢多啲活動。

佳佳年紀大，每日生活都好有恆常規律，日常飲食會去指定地點，減少不必要活動。海洋公園陸生動物部高級館長祝效忠講起，照顧佳佳最大挑戰係佢嘅消化力驚人，要保持佢有足夠活動。

其實佳佳平時已經唔食竹葉，因為佢牙齒唔好，咬唔爛食物。訓練人員就會準備一啲高纖麵包球，混入營養粉、維生素同埋鮮嫩竹子。除咗飲食，照顧人員要幫佢清除屋企嘅「障礙」，無論係植物、攀架、水池定斜坡，都要有特別嘅調整，以免佢撞傷。

8月長者免費入海洋公園

為慶祝佳佳嘅長壽及宣揚敬老精神，海洋公園宣布8月份65歲以上長者及8月份生日嘅人可免費入場，同行4位同伴享入場七折優惠。