傾政改 經民聯呻無人約
被問金鐘定西環約 梁家騮：阿彌陀佛
[2015.06.04] 發表
【明報專訊】立法會表決政改進入倒數階段，政制及內地事務局長譚志源前日話會約見議員盡量爭取支持，點知有建制派議員收唔到邀請嬲嬲豬。Emily聽聞，經民聯主席梁君彥前日仲WhatsApp問譚志源，點解經民聯仲未收到通知。
譚志源自爆收梁君彥「投訴」
所有已表態否決政改嘅立法會議員，噚日喺立法會每當出入議事廳時，都會被追問﹕「政府約咗你見未？」當中以人稱「怪醫」嘅醫學界梁家騮嘅答案最曖昧。Emily問政務司長林鄭月娥有無約佢，怪醫話「無」；咁有無人約佢呢？怪醫答「唔好講」。Emily聽到梗係追問怪醫，搵佢嘅人嚟自金鐘定西環？點知怪醫答咗句「阿彌陀佛」就走咗人。
譚志源噚日再被記者問到係咪只約見泛民唔會見建制派議員時亦急急澄清，仲自爆收到梁君彥電話「投訴」，譚志源話，當時覆梁君彥話「我經常見你」，但如果任何其他建制派議員想同政改三人組講政改，佢哋係無任歡迎嘅。梁君彥同Emily講，佢都係要求吓啫，仲話自己無時間見官員講政改。
更多港聞
【明報專訊】經民聯梁美芬早前提出私人條例草案，修訂《消防安全（建築物）條例》，賦予消防處長酌情權，因應安全和緊急考慮，協助舊樓提升消防系統，...
詳情
相關新聞
