議員考察山頂纜車
[2015.04.10] 發表
【明報專訊】山頂纜車公司經營權年底屆滿，政府建議5月修訂《山頂纜車條例》，向現有纜車公司批出10年經營權。纜車公司早前話計劃投資6億元改善服務，包括擴建花園道纜車站同增加車廂，令載客量提高六成。由於續經營權要立法會審議，纜車公司不敢怠慢，6名立法會議員噚日就去咗搭纜車考察。
擬加兩車卡 增載80人
有份考察嘅工聯會王國興(右五)話，原來纜車因為路線關係，唔可以加高加闊，所以纜車公司現計劃每列車加多兩卡車廂，並擴建車站，咁就可以將載客量由每班車120人增至200人嘞。興哥本來唔係今次考察搞手(即立法會經濟發展事務委員會委員)，但由於佢係港島直選議員，所以都好關心。
興哥引述纜車公司話，公司喺增設車廂外亦會擴建花園道纜車站，配合新車上落車，但花園道纜車站附近地方有限，有個本來用嚟維修嘅雜物房可能要「讓路」，纜車公司亦計劃喺該站建行人自動斜路，咁以後由車尾行去車頭幾步路都可以慳番！
經濟事務委員會委員莫乃光(右起)、主席林健鋒、委員單仲偕、謝偉俊(右六)，以及委員會外嘅議員郭偉强(右四)都好關心呢件事，你睇佢哋聽得幾專注！
更多港聞
相關新聞
