月全食「食唔晒」因為少污染？

與2011年（右）及2014年（左）的月全食比較，上周的月食（中）明顯多了一條光帶。（梁威恆攝/香港天文學會提供）

【明報專訊】上周六嘅月全食罕有掀起爭議，原因係香港同台灣嘅天文愛好者喺月全食期間拍攝嘅照片，發現「血月」嘅上方有一條光帶，同以往月全食唔同；香港天文學會比較咗大量數碼照片同外國天文雜誌嘅觀測報告，斷言只係一次月偏食，至於點解天文台以至美國太空總署推算均出現偏差，香港天文學會掩星組組長余惠俊話，今次事件同空氣污染有關。

天文學會認為只係月偏食

余惠俊話，數碼攝影好先進，民間攝影器材都可以拍攝到極清晰嘅天文照片，天文學會檢視天文愛好者用raw格式(無經圖像處理嘅原始檔案)拍攝嘅月全食相，並放大逐格數，發現地球本影只覆蓋約99.5％月球表面，所以認為只係月偏食。

佢又話，天文台同美太空總署嘅推算軟件，都係根據過往觀測數據為基礎，但過去地球空氣污染嚴重，令地球嘅本影較大，所以權威軟件將地球本影加大1％到2％；上周六嘅月食，由於月亮北部緊貼喺本影及半影嘅分界線，加上嗰日污染物較少，令本影投射角度變番正常，以致「食甚」時，本影未能完全覆蓋整個月亮，所以出現光帶。

太空館﹕或要太空人實地測量

香港太空館噚晚喺facebook解釋，地球本影和半影之間，並非真係有一條明顯界線，所以接近本影邊緣嘅區域並非完全黑暗，又話將來發生呢種「極限月食」時，要請「太空人」喺月球上實地測量，有無陽光射到月球表面，以決定係咪月全食。至於上周六嘅月食係全食定偏食？太空館同天文台都話要留待科學界研究。

更多港聞

回應成智言論 卿姐：黨內已傾政改廿次

【明報專訊】民主黨中委黃成智早前提出有條件「袋住先」嘅言論，被黨友許智峯高調投訴指違黨紀，黃成智前日話，唔記得中委有討論過否決8?31框架下... 詳情

馬術匯演幕後導賞

【明報專訊】香港賽馬會同糅合馬術與劇場表演嘅國際級匯演Cavalia，合辦多項社區推廣活動及教育工作坊，其中馬會舉辦5場特別日場，免費招待1... 詳情

李連生出殯

【明報專訊】前全國人大代表、新界社團聯會創會會長李連生於3月22日病逝，噚日舉行公祭。特首梁振英及政務司長林鄭月娥前晚去靈堂致祭，國務院港澳... 詳情