【明報專訊】佔領金鐘持續咗75日,而過去70幾日,財爺曾俊華外訪行程緊密,去過美國、歐洲、澳洲同中東,足迹遍及7個國家11個城市。不過,啱啱喺中東返嚟嘅財爺話,無論身在何方都記掛住香港,佢話對金鐘平安清場感到安慰,總算暫時放下心頭大石喎。
不過,財爺都明白,佔領雖告一段落,但唔意味市民嘅分歧得到修補,更唔代表政改嘅前景變得明朗。佢游說泛民議員唔好否決政改方案,話有人寧願原地踏步,寧願剝奪500萬選民嘅投票權,認為呢種主張自然好難得到為數不少、渴望可以投票選特首嘅市民支持。所以佢奉勸大家放下分歧,否則2017年普選行政長官搞唔到,2020年立法會選舉嘅改革更會遙遙無期。
訪阿聯酋總理沙漠別墅
財爺噚日喺網誌講佢上星期出訪中東嘅行程,話最感到榮幸嘅係,獲阿聯酋副總統兼總理、迪拜酋長阿勒馬克圖姆邀請,上周四晚到對方私人別墅會面,佢話呢間別墅位於迪拜郊區沙漠地帶,係總理同家人度周末嘅地方。財爺話,總理同佢講每逢周末都會喺別墅騎馬,唔怪得對方可以喺兩年前嘅國際耐力賽中得到冠軍,而對方當時已經63歲,用咗8小時騎馬跑咗160公里。