【明報專訊】「香港蜘蛛仔」喺「獅子頭上釘banner」引起熱話，繼飛鵝山同大帽山都有人爭相仿效之外，連市區公路都被「我要真普選」橫額攻陷，甚至喺大埔海濱公園嘅回歸紀念塔，前晚都出現類似直幡。佔領者日日掛，搞到政府部門人員要密密拆。

噚日朝早陸續有人喺網上貼相，見到呢塊黃色橫額遍及九龍新界，分別出現喺觀塘駿業里行人天橋、吐露港公路，仲有大埔太和路嘅大埔超級城行人天橋，每條橫額都掛喺車來車往嘅公路上，吸引駕駛者爭相影相。

食署：天橋掛海報可罰款

不過，全部橫額最後都「被失蹤」，有大埔網民曾經影到，噚日晏晝有個身穿便服嘅男人拆走掛喺太和路行人天橋嘅橫額，並棄於旁邊嘅垃圾桶。Emily傍晚再去睇，已經搵唔番幅橫額咯。

警方話，掛橫額一事已經交畀相關部門處理，食物環境衛生署就話接到警方轉介後曾經去過巡查，但無發現。食環署又話，根據《公眾衛生及市政條例》規定，任何人喺行人天橋展示招貼或海報，即屬犯罪，一經定罪最高可被判罰款1萬蚊同每日罰款300蚊。

柴灣現「佔中GO HOME」

掛橫額唔係佔中者專利，有人照辦煮碗，柴灣漁灣邨噚日就出現一幅反佔中橫額，寫住「佔中GO HOME」，叫佔中者返屋企。房屋署就話，因為橫額無向房署申請，屋邨辦事處即刻勸喻有關機構拆走橫額。