【明報專訊】佔中發起人之一朱耀明及工黨李卓人等人早前赴台，結果被內地官媒及建制派冠上「勾結台獨」罪名，搞到佔中三子好大壓力。不過，三子之一嘅陳健民教授仍頂住壓力，上個禮拜如期去咗台灣3日，但行程主要同當地學者、民間團體同埋留學生交流，刻意避開政界人士。陳教授話，今次外訪，香港傳媒報道唔多，暫未見有人鬧佢，慶幸今次旅程無風無浪，佢可以唞一唞。

慶幸旅程無風浪

陳健民12月5至7日至去咗台灣出席交流活動，第一日出席中央研究院嘅演講，同當地學者介紹香港政制發展與佔中；翌日去咗政治大學出席兩岸三地公民社會研討會。陳教授感受最深嘅係第三日，因為嗰日同香港及內地僑生會面。

陳教授話，喺台灣讀書嘅香港及內地生，普遍唔太熱中政治，但嗰日有成60人出席活動，大家都好關心香港情况，有港生仲問佢點樣先可以支援佔中，有人仲話考慮佔中舉行時返港參加。研討會上大家熱烈發言，散場後唔想走，繼續圍埋一齊再傾。陳教授話，去到台灣見到班後生仔，覺得好鼓舞，「對我係一個精神支持！」

有港生問如何支援佔中

佔中人士早前去台灣見民進黨前主席施明德，陳教授話心理上唔怕畀人抹黑，但始終唔想市民誤會佢哋搞台獨，所以今次刻意避開政界人士。佢又話，當地嘅朋友都笑佢，因為台灣有啲人已經話，施明德跟中共有聯繫，已唔當施係台獨一分子，所以中共話佔中同施明德勾結，覺得好好笑喎！