【明報專訊】前特首董建華嘅太太董趙洪娉，喺2003年SARS時憑一句「千祈千祈千祈，洗手洗手洗手」而街知巷聞。原來董太對於「愛國」亦有獨到見解，佢噚日接受港台節目《中國點點點》訪問，就話「愛國」好容易，只要先去「愛民」，去愛爸爸媽媽、兄弟姊妹、爺爺嫲嫲，再愛出去，愛就會慢慢傳開去。 董太搞咗個群力資源中心，曾經同解放軍駐港部隊及教育局主辦「香港青少年軍事夏令營」，被問點解軍方會咁支持佢，董太話事先都唔識軍人，但有喺董生安排下同對方食飯，而香港人都係中國人，相信如想「征服大家」，都要搞好啲「屋企人」先。講到要征服人咁激？主持當然即刻問清楚，點解董太要用「征服」、乜嘢叫「征服」，董太就即刻澄清，話要改番做「愛護」唔係「征服」！ 軍事夏令營不談政治 董太又話，如果愛國係「洗腦」，咁佢都覺得自己「guilty(有罪)」，但如果係教人愛其他人，就「睇唔出有咩係唔啱」，「打死」都會繼續做。佢強調搞夏令營認識解放軍，絕對唔會提政治，但可能會講「愛國」。咁講唔講得六四？董太話夏令營不談宗教政治，佢又否認「愛國」係政治，「唔係喎，你錯喎，(夏令營)係體能同愛」。
|
| |
| |
;){kind=small}
