【明報專訊】免費電視發牌風波近日成為全城熱話，政府個發牌標準惹起唔少爭議，噚日國際青年商會香港總會公布「十大傑青」得主名單，作為評審之一嘅中文大學校長沈祖堯亦攞發牌風波講笑。佢喺致辭時提及，有人問到今年十大傑青得8個得主，點解唔選夠10個，佢就話個選舉標準「同今日電視台三個選兩個無關係」，引來台下大笑。

咁到底香港係咪唔夠人才選傑青呢，沈校長解釋，10個名額只係上限，但評審團揀傑青一定要揀最好，唔會為咗湊數而選，而過往幾年都試過傑青得主唔夠10人。會後一班記者行家想捉住沈校長追問佢對發牌一事有乜嘢睇法，沈校長一聽到就耍手擰頭，話「趕時間」就急急閃人。