【Emily】上機體驗前線 國泰CEO遇航班取消
[2023.12.29] 發表
【明報專訊】聖誕假期係旅客外遊嘅高峰，有航空討論區引述「國泰航空內部消息」，話國泰行政總裁林紹波(Ronald)原定前日(27號)飛上海，因航班取消要轉搭另一班機。據Emily了解，Ronald班機的確因為機組人手不足，搞到最後要改上另一班機，但當時佢係上機體驗前線工作，而唔係做乘客飛上海。
消息人士解釋，Ronald原本上嘅嗰班機，因為請病假嘅機組人員太多，導致航班最終取消，佢要改上另一班。不過，消息話Ronald當時身分唔係搭客，而係以體驗前線身分，落場幫機組同事手。
據Emily所知，國泰管理層定時定候都會輪流參加類似嘅前線體驗日，走上第一線，Ronald當時因為咁而要上機，聽聞佢無變身空少，都係著番西裝，雖然未至於要擔擔抬抬，但都有幫下同事執頭執尾。
國泰亦發聲明，話呢個月流感季節期間，機師因病缺勤較預期多，但整體營運保持正常。國泰話，為應對呢個情况同確保整體航班服務正常，決定主動取消個別航班，月中以嚟少於總數1%嘅客運航班被取消。
更多港聞
【明報專訊】聖誕假期啱啱過咗，歡樂氣氛仍然持續。私隱專員公署關愛義工隊前日去咗探訪聖雅各福群會灣仔長者地區中心，為超過80個長者送上關懷，仲...
詳情
相關新聞
