【Emily】快運派2.1萬張機票「塞車」 吸嬲千計
[2023.07.12] 發表
【明報專訊】機管局為響應政府推出嘅「你好，香港！」，透過本地航空公司向市民派發8萬張香港出發免費機票，香港快運(HK Express)噚日派咗逾2.1萬張，市民喺朝早10點半於網上排隊搶票，未到下晝6點就搶晒。不過網站一開始就塞車，唔少網民等咗幾個鐘都無進展，湧入快運facebook專頁派咗約千個「嬲嬲」。
Emily噚日約10點起試入網站，顯示要等十幾分鐘，至大約10點20分就改為「一個多小時」，等咗3個鐘都無變過。唔少網民喺快運facebook專頁講類似情况，有人話就算輪到自己，個網都無轉入購票頁面。快運回應話網站流量過多，令等候時間延長，同埋要讓伺服器穩定運作。
快運喺下晝5點51分宣布機票派晒。19個目的地中，名古屋、高松、鹿兒島、首爾同台北最受歡迎，未到下晝1點半鐘就清晒；越南峴港同芽莊最冷門。部分網民話完咗都未能入到網站。
港航月尾起分3階段送機票
搶唔到嘅市民唔使灰心，另邊廂嘅香港航空就話，會喺7至8月期間分3個階段送出逾2.5萬張機票，首輪活動7月24日開始，詳情有待公布，想去旅行者可留意港航facebook同官網。而國泰嘅2.7萬張免費機票就以抽獎形式送出，結果已喺5月出爐。
更多港聞
【Emily】房協推減碳賺分換禮品 終極大獎Tesla
【明報專訊】房協本月至12月期間舉行「萬家減碳FUN獎賞」鑽禧社區計劃，噚日舉行啟動禮。計劃透過手機應用程式（App）「Zero2」，同逾5... 詳情
【明報專訊】近月本港天氣好熱，立法會前議員范國威（Gary Fan，綽號咖喱飯）正因民主派「35+初選案」還押，另一前議員邵家臻噚日去荔枝角...
詳情
相關新聞
