【Emily】房協推減碳賺分換禮品 終極大獎Tesla
[2023.07.12] 發表
【明報專訊】房協本月至12月期間舉行「萬家減碳FUN獎賞」鑽禧社區計劃，噚日舉行啟動禮。計劃透過手機應用程式(App)「Zero2」，同逾500間商店及食肆合作，鼓勵房協轄下屋邨居民「減碳」，居民只要透過不同類型嘅減碳行動，例如回收舊衣及慳水等，就可以喺應用程式賺積分，用嚟換領唔同獎賞，終極大獎係Tesla電動車一部。
房協話，早於6月已於各出租屋邨推廣計劃，至今有逾萬名參加者登記；居民下載App就可透過「衣食住行」四方面入手，建立低碳及健康嘅生活習慣，同時呼應番房協75周年嘅主題「創建宜居．永續共融」。
房協主席陳家樂話，房協一直重視可持續工作，上年更成立跨部門嘅可持續發展工作小組，負責規劃、協調及監督相關工作，未來都會持續推動有關工作。
參與計劃嘅食肆負責人楊先生就話，居民光顧餐廳時可透過走塑等行動賺取積分，以換取唔同類型禮品，包括小食及米線等，並期待透過計劃進一步建立市民減碳意識。
更多港聞
【明報專訊】近月本港天氣好熱，立法會前議員范國威（Gary Fan，綽號咖喱飯）正因民主派「35+初選案」還押，另一前議員邵家臻噚日去荔枝角...
詳情
相關新聞
