【Emily】議員撐改議規 冀立會續放暑假
[2023.06.10] 發表
【明報專訊】早排有建制派評論質疑，立法會會期已改為每年1月至12月，按以往喺7月至10月休會「放暑假」嘅做法「莫名其妙」。噚日立法會內務委員會討論到，刪除《議事規則》有關同一會期內兩次會議相隔時間不得超過6星期嘅條文，立法會就可以繼續維持約4個月嘅休會，發言嘅議員都話支持修改條文。有關嘅決議案，將由議事規則委員會主席謝偉俊喺今個月28日嘅大會動議，噚日佢話新修訂無改變立法會工作模式。
新民黨黎棟國發言話，休會可以畀立法會秘書處職員休息，處理積壓工作，議員都可以有時間多啲外訪。工聯會梁子穎話，議員喺休會期間可以有更多時間落社區「把脈」；民建聯陳克勤就話，議員可以喺休會時安排考察同訪問，或者落區同接觸業界。金融界陳振英亦話雖然暑假期間無會議，但主席有需要都可隨時召開會議，議員都要隨時候命。
更多港聞
相關新聞
