【Emily】標記蔴雀 原址重開
[2023.05.13] 發表
【明報專訊】屹立逾半世紀、專營手雕麻將嘅「標記蔴雀」噚日喺原址重開喇！「標記蔴雀」位於佐敦道唐樓樓梯底舖位，上年面臨清拆危機，老闆張景順(人稱景叔)透過兒子同Emily講，過去半年做咗裝修，包括加設防火板、拆除被屋宇署評估為僭建物嘅部分，嚟重新符合屋宇署規例同消防條例。
景叔話可以原址重開好開心，特別多謝業主同埋相關政府部門連月嚟嘅協助，又感謝業主承擔工程費同埋願意續租。佢又話雖然年過七十，但只要仍然有心有力，都想繼續將手雕麻將呢樣本港非物質文化遺產傳承落去，畀更多人欣賞。
標記蔴雀舊年9月收到屋宇署清拆令，署方話樓梯舖位置屬僭建，一度面臨清拆。屋宇署其後解釋絕非針對樓梯底地舖，而係逃生梯被收窄及欠耐火間隔，若業主提交合理建議、確保唔會對樓宇同其他人構成明顯安全威脅，樂意考慮盡量保留。
更多港聞
相關新聞
