【Emily】憶瑪麗拍攝 袁國勇：張婉婷好照顧師妹
[2023.02.11] 發表
【明報專訊】《給十九歲的我》引起爭議，除咗牛下女車神李慧詩，電影仲有另一張熟悉面孔，就係港大微生物學系講座教授袁國勇，片中10幾個同學一齊參觀佢喺瑪麗醫院嘅實驗室。袁國勇同Emily憶述，大約10年前導演張婉婷主動聯絡話想帶師妹參觀實驗室，拍攝之前醫院部門主管、傳訊部都同意。袁話當時知道張係為英華女學校拍紀錄片，但唔知片段會用咩形式播放，而早前電影公映，佢亦覺得無問題。
袁國勇話唔想評論太多，但拍攝當日感受到張相當照顧師妹們，例如主動介紹各學生嘅志向。佢仲讚英華女學校係「好好嘅學校」，以往出席學校畢業禮，覺得校長老師一視同仁教導每個學生。
套片退出競逐金像獎最佳電影，英華女學校嘅辦學團體、香港基督教協進會主席王家輝話𠵱家唔適合接受有關獎項提名，但學校無辦法就其他獎項代製作團隊做決定。佢形容「人較電影重要」，希望𠵱家先處理好溝通、平復受困擾者嘅心情，期望學校、製作團隊有機會同幾個主角交代整個過程。
更多港聞
【Emily】「爭拗令社會落伍」 張翔：冇人想見到
【明報專訊】香港大學噚日舉行傳媒春茗，校長張翔率領首席副校長王于漸等高層見記者。張翔致辭時話，香港要與時並進（remain relevant... 詳情相關新聞
