【Emily】發展局副秘調任北都辦主任
[2023.02.04] 發表
【明報專訊】Emily發現，發展局轄下近期成立咗一個新組別「北部都會區籌備辦公室」，主任身分啱啱公開，由原任發展局副秘書長嘅丘卓恒調任。睇番北都辦嘅編制，目前有副主任、首席助理秘書長同一啲行政支援職位，其中副主任翁佩雲曾任前運房局首席助理秘書長兼房屋署助理署長。
丘卓恒做發展局副秘書長時有參與北都項目。佢日前出席立法會人事編制小組委員會議，申請開設發展局首席助理秘書長職位，協助處理規劃同地政事務，就畀議員葉劉淑儀質疑政府係咪有需要成日開設新首長級職位，而唔喺內部調配。丘卓恒係AO，做過唔同部門，包括喺曾蔭權任特首年代做特首辦助理處長(傳媒)。
政府左位調右位嘅安排並唔新鮮，好似民青局青年專員劉家麒，其實本來都係民青局副秘書長，佢草擬完青年藍圖後，就順理成章搬位去佢有份度身訂做嘅專員職位。
更多港聞
【Emily】東江縱隊港九獨立大隊賀80周年 官員讚愛國
【明報專訊】東江縱隊港九獨立大隊噚日舉行80周年紀念活動，多個官員同立法會議員出席，見證老隊員向在座學生講述當年嘅抗戰事蹟，大會又安排學生向... 詳情相關新聞
