【Emily】東江縱隊港九獨立大隊賀80周年 官員讚愛國
[2023.02.04] 發表
【明報專訊】東江縱隊港九獨立大隊噚日舉行80周年紀念活動，多個官員同立法會議員出席，見證老隊員向在座學生講述當年嘅抗戰事蹟，大會又安排學生向老隊員獻花。文體旅局長楊潤雄出席活動後，喺社交平台話銘記歷史可以借古鑑今，仲可以藉探討前人嘅英勇故事，向青少年灌輸愛國精神。
港九獨立大隊喺1942年2月成立。特首李家超視像致辭時形容大隊喺香港淪陷後堅持武裝抗日，體現港人嘅愛國情懷，亦係香港嘅珍貴歷史文化遺產。有份出席嘅行政會議召集人葉劉淑儀話，東江獨立大隊當年除咗自發抗日外，亦協助好多文化人喺日佔期間返內地，又提到大隊當年有200人，但噚日出席嘅唔超過10人，其中會長林珍當年8歲已加入東江縱隊，𠵱家已經88歲，但憶述當年事蹟時依然中氣十足。
更多港聞
相關新聞
