【Emily】圖書館下架書 陳家洛倡送捷克「禁書館」

【Emily】圖書館下架書陳家洛倡送捷克「禁書館」

[2022.11.11] 發表

【明報專訊】本報噚日報道，公共圖書館喺《文匯報》點名後，將至少17本漫畫、笑話書同小說下架。消息一出，研究東歐歷史同政治嘅國際關係學者陳家洛喺facebook話，捷克布拉格有個特別嘅圖書館，專門收藏因政治因素而被禁嘅刊物。佢「建議」康文署不如將所有under review(送審)、不見天日嘅館藏送過去，「咁樣合作未嘗唔係好事喎」。

其中一個受下架風波影響嘅作者、現已轉做其他創作嘅前漫畫家「白水」都喺facebook轉載報道，話「雖然改變唔到啲乜……但都叫盡過力！」出版社次文化堂社長彭志銘就慨嘆「圖書館又有書下架」。

作者：改變唔到乜，但都盡過力

睇番資料，布拉格呢個圖書館叫Libri Prohibiti，捷克共產時期作家同藝術家因為作品被禁出版，會秘密印刷同傳閱，直到結束共產之後，就改成圖書館。