【Emily】梁繼昌「機動木人樁」練詠春
[2022.11.11] 發表
【明報專訊】立法會會計界前議員梁繼昌(Kenneth)除咗偶爾騷下肌肉同游水外，本身都練習詠春七八年，算係「習武之人」。Kenneth噚日上載師父、葉問隔代傳人何健洛嘅天台練習場館，原來除咗大家見開固定嘅木人樁外，仲有個可以前後移動嘅機動木人樁練習。Kenneth話，呢部木人樁用柴油發動機推動，如果調校到最快速度嘅第四段速，恐怕任何武林高手都招架唔住。
Kenneth話，好似洪金寶近期執導嘅短片《七人樂隊．練功》，指天台武館喺六七十年代比比皆是，不過佢話何師傅個二千多呎天台就係五星級，除咗設備齊全、地點優質外，仲收藏咗何健洛師傅個爸爸，即係何聯師傅精心設計同自製嘅各種木人樁。
佢又話，今年係葉問逝世50周年，特別多謝樹仁新傳系主任李家文編寫嘅詠春口述歷史，同幫手推廣詠春。
更多港聞
【明報專訊】近年報讀內地院校的香港學生有上升趨勢，中國教育留學交流（香港）年中數據顯示按年升2%，是11屆中學文憑試（DSE）以來最多。國家...
詳情
相關新聞
