【Emily】郵差易中暑 工會促發高度辛勞津貼

[2022.08.05] 發表

【明報專訊】炎炎夏日，郵差拎住大袋信件逐家逐戶派發，都咪話唔辛苦。工聯會噚日就同郵務職工會代表一齊見記者，職工會會務主任池逸昭話有唔少郵差因為天氣酷熱而中暑，促請政府向郵差發放「高度辛勞津貼」。

停車派信要熄匙車內可達60℃

多名工會代表講述郵差嘅辛酸，工會理事長張偉權話政府要求停車熄匙，架車閂咗冷氣閂埋車窗，當郵差派完信返嚟，車內溫度隨時高達50℃至60℃，郵差為完成派遞指標，有時連開窗散熱一陣先開車嘅時間都冇。

工聯會立法會議員郭偉強建議立法加強對戶外工友嘅職安保障，促請郵政局為郵差提供更多支援，例如喺高溫下畀郵差足夠時間小休、考慮改用電動汽車，同埋喺派完信可遙距撻着架車同開冷氣，早啲散熱降溫等。

郵務職工會又引述勞工處2009年推出嘅熱壓力評估表例子，話郵差中暑風險屬於高度，建議香港郵政考慮參考最近康文署為救生員發出嘅「高度辛勞津貼」、「執行厭惡性工作津貼」。

更多港聞

【明報專訊】香港新冠陽性個案噚日破5000宗，個人資料私隱專員鍾麗玲、消防處長楊恩健都先後核酸檢測同快測陽性，正按衛生防護中心命令隔離，鍾麗... 詳情