【Emily】劉頴匡獄中讀書 手寫論文GPA過3.4

【明報專訊】因民主派初選案正在還押嘅劉頴匡，讀緊都會大學嘅「語言與翻譯榮譽文學士」課程，佢嘅facebook噚日公布佢獄中修讀學位第一年嘅成績，話取得一科A-，兩科B+，GPA有3.43。

佢嘅fb話，獄中要一字一筆手寫論文，冇互聯網冇圖書館，都冇導師授課，全靠自律自學，呢個成績已算相當唔錯；而劉頴匡好幾份B+嘅功課，導師嘅評語都係期望答案有更多額外參考資料。佢fb編輯亦即係女友，話對阿匡嘅表現相當滿意，而阿匡本人就比較平淡，只係想研究點樣可以攞到一級榮譽。

另外，正喺海外嘅港大學生會前會長馮敬恩透露，佢今年1月到咗溫哥華嘅英屬哥倫比亞大學(UBC)，攻讀第二個碩士「Master of Library and Information Studies」。佢提到去年初重執「教鞭」教補習，今日佢有學生DSE放榜，勸勉即使考得唔好，唔好擔心，世界很大，出路很多。佢又透露原來佢係當屆港大文學院最低分數入學嘅人(中文5*，英文5，數學5，通識4，經濟5)，當時無諗過最後會主修中文同副修政治，IELTS學術口語考試則取得8.5/9，「世界太多意想不到，擁抱未知，砥礪前行吧！」