【Emily】寄語政府 陳智思:勿寫市民冇興趣新聞稿
【明報專訊】政府點樣發放消息同爭取支持,一直係各地政府嘅重要課題。行政會議召集人陳智思噚日接受商台訪問時講到,全世界包括香港在內嘅好多地方政府都面對一個挑戰,就係好多人唔係從政府途徑收取信息,而係從社交媒體或通訊群組睇資訊,唔接受其他人嘅睇法,加劇互相不信任同對抗,增加推行政策嘅困難。
佢話,政府要有自己途徑,將政策嘅信息、背後目的、有關實施嘅信息發放,「其實政府一定有佢途徑,但人哋係唔係收佢呢個信息就係一個問題」,指出下屆政府唔可能再用傳統思維,要有創新思維,跳出傳統框框。
陳智思喺節目後補充,政府唔可以禁止市民透過社交媒體獲取信息,唯一可以做嘅係更主動同加強信息傳遞,下屆政府應該要思考傳遞非常簡單嘅信息,而唔係好似律師角度咁撰寫一啲市民冇興趣睇嘅新聞稿。
佢又話,2019年社會事件同新冠疫情對香港聲譽影響好大,下屆政府喺疫情平穩後需到海外推銷香港同重建聲譽,因為外界對香港嘅印象仍停留喺2019年,未必睇到社會已經平靜,仲有經濟發展嘅機遇。