【Emily】婦女節致辭感謝助抗疫 林鄭：女性係一國兩制「堅實力量」

【Emily】婦女節致辭感謝助抗疫林鄭：女性係一國兩制「堅實力量」

[2022.03.09] 發表

【明報專訊】噚日係3．8婦女節，特首林鄭月娥以視像方式致辭，特別感謝女性喺兩年多抗疫工作嘅貢獻，形容好多醫護、前線同幕後抗疫人員、義工都係女性，一直堅守崗位，部分人更身兼兩職照顧家庭。

羅致光鼓勵男士為婦女平權發聲

林鄭月娥形容，女性係確保一國兩制行穩致遠嘅「堅實力量」，提到今屆政府推出各項政策，確保婦女能夠公平獲得社會資源同機會，包括增加法定產假至14個星期、加強幼兒照顧服務、喺政府處所設置更多育嬰間、修例保障餵哺母乳婦女免受歧視。佢並提到，目前女性公務員佔整體公務員近四成，2020年喺私人市場亦有近37%經理及行政級人員為女性，創歷史新高。

勞工及福利局長羅致光就話，政府透過加強支援照顧者，減輕婦女嘅家庭負擔同壓力，又話推動兩性平等唔可以單靠政府，需要社會共同參與，鼓勵身邊嘅男士為婦女平權發聲。

教育局長楊潤雄亦喺facebook發文向女性致敬，佢分享咗一段2018年製作嘅高中英語文學短片教材，講述一個女仔同外婆之間嘅故事，外婆悉心照顧孫兒；話想向學生帶出希望同正能量。