【Emily】葉劉話有局長英文唔好 被外媒笑
[2021.12.10] 發表
【明報專訊】《華爾街日報》早前社論話杯葛立法會選舉同投白票係港人表達政治觀點嘅最後方式之一，政制及內地事務局長曾國衞去信該報話震驚，港府會保留採取必要行動嘅權利。港島西候選人、新民黨主席葉劉淑儀噚日喺港台選舉論壇，唔點名提到最近有局長被《華爾街日報》嘲笑佢恐嚇，「就係(因為)佢英文唔好」，問對手英文同普通話唔好嘅人可唔可以做高官。
離島區議員方龍飛話香港以廣東話為主，「我哋可以慢慢學囉」，又自言英文都唔好，繼續學習緊，反問係咪英文唔好就唔可以向上流。葉太強調係講緊高官，香港官員應向新加坡學習，話當地官員英文好到可以寫書，回應外媒批評嘅文章靚到可以貼堂，「我哋官員差好遠」，希望共同推動高官提高語文水平。港島西另一候選人係民建聯陳學鋒。
另外，港台噚日亦搞地產及建造界選舉論壇，只得趙式浩一個候選人出席。趙隔空向對手、地產建設商會秘書長龍漢標送禮，送咗個長期服務獎畀龍生，話佢為地產界服務多年，但喺建造方面就唔熟悉同無做任何嘢；又話若龍生有日退休，可拎個獎去英國或者加拿大好好生活。龍漢標有英國同加拿大居留權，佢早前接受訪問表明唔會放棄。
更多港聞
【Emily】孫中山館重塑「四大寇」事蹟 展合照底片
【明報專訊】適逢孫中山誕辰155周年暨辛亥革命110周年，今年慶祝15周年嘅孫中山紀念館今日起至明年3月中舉行「四大寇——從照相重塑革命記憶... 詳情
大學聯招首階段截止 教大歷史最搶手 浸大電影35人爭一席
【明報專訊】大學聯合招生辦法（JUPAS）首階段申請前日（8日）截止。較搶手的學科包括教大歷史教育榮譽學士，379人將該科放Band A（首... 詳情相關新聞
