【Emily】選委界候選人論壇 陸頌雄講錯自己number
[2021.11.27] 發表
【明報專訊】喺噚日香港再出發大聯盟嘅選舉論壇，孫中山家族第五代後人、報稱係行政總裁嘅孫偉勇喺台上承諾話當選，會「全身、full time投入議會工作」。中電中國區總裁陳紹雄亦同Emily講，若果當選想全職做議員，但香港專業及資深行政人員協會等「兼職」就應該會繼續做，因可同議會工作相輔相成。
工聯會陸頌雄喺論壇係第一組上場嘅候選人，佢開場發言時講錯自己係6號候選人(其實係1號)；到總結時，佢引用毛澤東詩句「雄關漫道真如鐵，而今邁步從頭越」，話要有新長征精神，改善民生，重新強調佢係1號候選人。
Emily數過，喺論壇中，城大教授孫東、鳳凰衛視主持人曾瀞漪、政協委員屠海鳴、交銀國際董事長譚岳衡共4個候選人用普通話發言，而投資推廣署前署長盧維思、蘭桂坊集團主席盛智文就用英文。盧維思開場發言特別用廣東話介紹自己。
任職巴士車長嘅工聯會候選人蔡永強穿上九巴制服出席論壇，係咪故意咁著突顯職業？佢同Emily講，其實係啱啱收工趕嚟。
選委會界別有51名候選人，名單見立法會選舉網站。
更多港聞
【Emily】九巴明年換制服 車長著紅黑Polo恤
【明報專訊】九巴2011年4月起使用嘅車長青色恤衫制服即將成為歷史。九巴噚日宣布會喺明年1月10日起，陸續為車長、站長同站務管理員更換新制服... 詳情相關新聞
