【Emily】徐英偉拍片做手語傳譯籲投票
[2021.11.27] 發表
【明報專訊】下個月19號係立法會選舉投票日，為咗鼓勵市民投票，民政事務局長徐英偉唔單止用口講，仲落手做。講緊嘅係佢噚日喺facebook上載影片，除咗以旁白呼籲市民投票，畫面右下方有個橢圓形小畫面，徐英偉就喺入面做手語傳譯旁白。宣傳片長約1分鐘，徐英偉話用咗半個鐘先學識呢段手語，大嘆唔容易。
片段最尾仲剪輯徐英偉學手語嘅花絮，練習嗰陣佢有時要手語老師提醒動作，有時又唔記得手勢點做。佢講笑話，學手語同佢「讀普通話一樣咁難」，手語傳譯「都係留番畀專業人士做就最好」。徐英偉之前做過勞福局副局長，佢話嗰陣已經對手語議題好上心，而手語對聾啞者嚟講係好重要嘅溝通模式，所以佢想透過拍片呼籲市民投票，並推動大家關心弱勢社群同埋學習手語。
更多港聞
【Emily】九巴明年換制服 車長著紅黑Polo恤
【明報專訊】九巴2011年4月起使用嘅車長青色恤衫制服即將成為歷史。九巴噚日宣布會喺明年1月10日起，陸續為車長、站長同站務管理員更換新制服... 詳情相關新聞
