【Emily】立選轉戰選委界 容海恩去街市宣傳

【Emily】立選轉戰選委界容海恩去街市宣傳

[2021.11.09] 發表

【明報專訊】新民黨新界東立法會議員容海恩(Eunice)轉跑道，改循選委會界別競逐連任並已報名，選民由地區街坊變為近1500個選委，不過佢噚日仍然拎住宣傳品落區到大埔街市宣傳。Eunice同Emily講，即使係選選委會界別都要多啲落區聽街坊意見，而選委都會去街，大部分市民話希望盡快通關，而街市商販有講到市民要掃「安心出行」入街市後生意少咗。

話似選特首個個界別都要了解

佢提到，想喺呢段時間多見選委聽意見，達至更完善政綱，並已見咗中醫界、飲食界、內地港人團體界別等，形容選選委會界別好似選特首咁，真係要個個界別都有了解。

至於會否幫喺新界東北出戰嘅黨友李梓敬一齊落區拉票，Eunice透露今日就會同李梓敬去大圍街市了解街坊關注，同時會提醒李梓敬佢過去關注大圍街市冷氣問題嘅情况。

選委會界別還有另外43名參選人；新界東北參選人還有民建聯陳克勤、民主思路黃頴灝。