【Emily】疫下失魂魚減 六合彩1900萬無人領
【明報專訊】上周四晚獨得9124萬元歷來六合彩頭獎最高派彩嘅幸運兒究竟攞咗支票未,馬會一貫政策守口如瓶,不過上年度無人認領六合彩彩金就已經喺年報透露咗,由前年8800萬元大減至1900萬元,減幅78%,主要係疫情期間投注站長時間暫停服務,所以唔記得去投注站領取派彩嘅「失魂魚」明顯減少。
馬會前日公布2020/21年度六合彩投注額大減34%,由51.6億元降至34億元,同樣係由於曾經關閉投注站,令六合彩攪珠去年2至9月中暫停舉行,到今年5月先恢復喺投注站售賣六合彩彩票。
2020/21年度賽馬會年報顯示,該年度無人認領嘅賽馬投注及退款為1800萬元,比2019/20年度2800萬元下跌36%,亦係因為填寫彩票投注賽馬嘅市民減少所致。