【Emily】教區選委抽籤 潘焯鴻張俊勇唔中

[2021.08.17] 發表

【明報專訊】選委會選舉宗教界60席由團體提名產生，當中天主教香港教區佔10席，由於有40人報名，選舉主任噚日按程序抽籤決定人選。前港區人代張俊勇同港鐵沙中線醜聞「吹哨者」中科興業董事總經理潘焯鴻、民政事務局前局長藍鴻震都有參加，不過3人都唔中籤。

潘焯鴻同Emily講既然呢個係既定制度，只能欣然接受結果。佢期望中籤獲提名天主教選委嘅人能夠以善治、良知、正義、和平等天主教價值選特首，畀香港人時刻知道特首選舉嘅事，做好溝通橋樑。

張俊勇話抽籤最公平係天意

張俊勇話自第一屆選委會已參加教區選委提名，每次都唔中籤，今次中籤嘅排序係第15，認為係天意。佢希望天主教選委憑良心、按作為教徒嘅意願而為，唔好有壓力。佢又話抽籤係全世界最公平，「天意幾好，冇任何bias(偏見)」。

Emily向天主教香港教區查詢中籤名單，對方話仍要審查。據了解，中籤者要等候選人資格審查委員會審查資格，8月26日會刊憲公布。

更多港聞

【明報專訊】乘消費券熱潮，旅發局噚日宣布推出新一輪「賞你住」活動。年滿18歲、喺香港接種至少一劑新冠疫苗嘅人，由噚日起喺本地零售或餐飲實體店... 詳情

【明報專訊】言語治療師總工會5名成員因出版「羊村」系列繪本，涉嫌串媒發布煽動刊物被捕，其中兩人被控及還押。職工盟噚日喺facebook上載一... 詳情