【Emily】公屋新廁板「縮圈」 用家試完：怪怪哋

【明報專訊】人生唔少時間都會坐喺馬桶上面，廁所舒適度當然重要。深水埗區議會主席楊彧笑言最近跟緊個「大」議題，影響全邨、甚至全港公屋居民，原來係關乎廁所板內圈嘅大細。楊彧喺facebook話，邨內原裝廁所板好哋哋，但因為「日子有功」，部分開始損壞要房署更換，但新廁所板(圖)坐落去怪怪哋咁，原來係因為內圈長度由本身嘅28厘米，減到得番25厘米，新版邊緣仲要好利，唔似舊款圓滑。

楊彧話身為男人，完全感受到改變帶嚟嘅影響，話估計身形肥大嘅人更辛苦。佢話已經有唔少街坊投訴「好哋哋做乜要改」，但佢仲未問到答案，房署只係口頭透露現時全部換晒新貨、冇舊款，佢就已經去信問個詳細。楊彧又「自爆」屋企廁所板內圈有30厘米，「所以我去得好順暢」。民協黨友、黃大仙區議員施德來就笑佢，「真係急市民所急喎」。

更多港聞

【Emily】限聚下抗日碑獻花 新社聯13人留影

【明報專訊】唔少人會趁清明時節拜祭先人，亦有有心人去向抗日烈士表敬意。民建聯立法會議員陳克勤facebook就上載相片，見到新界社團聯會北區... 詳情