【Emily】委會倡煙稅倍增 料屆時每包賣$100
[2021.02.03] 發表
【明報專訊】政府正就新一份《財政預算案》諮詢公眾，香港吸煙與健康委員會日前聯同83個團體去信財政司長陳茂波，促請政府喺2021/2022財政年度大幅增加煙草稅100%，並按年增加煙草稅率，加快降低吸煙人口。
吸煙與健康委會：最有效降吸煙率
委員會主席湯修齊話，本港煙草稅率佔價格嘅比例為63%，遠低於世衛建議嘅75%。佢話目前一包捲煙嘅價格大約60元，相等於一個午餐嘅價錢，相對於1990年代，煙草嘅價格變得更易負擔。佢預料加稅100%後，捲煙煙包嘅零售價或會升至100元，希望倡議可於本年內落實，指建議加稅同增加政府收入無關，只考慮公共健康嘅問題。
湯修齊又話，政府已連續6年未有增加煙草稅，批評做法唔理想；而香港嘅吸煙率下降速度喺近10年開始放緩，吸煙率於2017年約10%，至2019年微升至10.2%，佢相信加稅係降低吸煙率嘅最有效方法。
港府計劃喺2025年前將吸煙率降至7.8%，除大幅增加煙草稅外，委員會促請政府盡快落實全面禁煙時間表，以及禁止電子煙、加熱煙等「另類吸煙產品」。湯修齊強調，冇一種煙草產品係比較「安全」，希望立法會盡快通過禁電子加熱煙草案。
更多港聞
【明報專訊】勞顧會勞方代表、工聯會鄧家彪噚日發公開信，「十問」勞工及福利局長羅致光點解仲未有失業援助金，佢邀請羅致光走出辦公室，公開辯論「設...
詳情
相關新聞
