【Emily】民建聯宣傳車 失陷「鎖車城」
[2020.08.31] 發表
【明報專訊】有揸車嘅可能都知，沙田第一城有「鎖車城」之稱，出晒名會極速鎖車對付違泊，當區區議員黃文萱噚日上載相片，顯示民建聯李慧琼、葛珮帆(EQ)嘅宣傳車被鎖，開鎖費要320元。
EQ同Emily講，當時宣傳車司機泊低架車去快餐店買外賣，幾分鐘出嚟就被鎖車；司機都有唔高興，因前後都有車停低，但冇被鎖，質疑有針對性。EQ話都提醒咗司機盡量唔好違泊，又話可能司機唔熟悉第一城出名私家路、鎖車快，同時希望第一城管理處體諒吓職業司機，對搵食車唔好咁苛刻。
黃文萱同Emily講，第一城嘅路唔闊，如果泊咗大貨車，其他車一定要慢駛，又話宣傳車後面約200米係十字路口，認為對阻街貨車嚴格係正確，因第一城冇咁多空間疏導交通，又話「犯法就係犯法，點都要負責」。
被質疑用國產車
譚文豪：租車公司畀
另一邊廂，有建制fb專頁話，公民黨譚文豪(Jeremy)所用嘅宣傳車，係國產名牌「JAC江淮汽車」，Jeremy就話係因為租車公司畀咗呢架車佢哋，並唔係佢決定，形容「(建制陣營)講到冇嘢好講」。
更多港聞
【明報專訊】不獲房協續租、近期捲入勞資糾紛嘅「黃店」社企餐廳「膳心小館」，前晚（29日）喺facebook發文宣布結業，形容係痛心嘅決定。店...
詳情
相關新聞
