【Emily】3狐獴B未改名 海洋公園邀投票決定
[2020.06.24] 發表
【明報專訊】海洋公園喺疫情期間閂咗，園內動物被迫「隔離」，其間有3隻「疫情寶寶」狐獴喺2月出世，但仲未改名。海洋公園就提議咗3組名出嚟，邀請公眾投票決定，有以港產特色小食為主題，亦有港式特飲主題。
預告新主席CEO周一現身
「小狐獴與大象龜之旅」下周一開幕，公園主席孔令成同行政總裁李繩宗齊齊喺7月退任，公園預告候任主席同行政總裁會喺嗰個開幕場合現身。Emily噚日就聽聞由公園首席財務總監陳善瑜做行政總裁嘅呼聲最高，接替同樣管數嘅李繩宗。
至於海洋公園副主席劉鳴煒就好大機會成為新一任主席，除咗睇劉鳴煒之前喺立法會好主動答議員提問，公園以前都有先例由副主席「坐正」做主席，例如孔令成就係嘞，所以今次劉鳴煒「坐正」絕對唔出奇。海洋公園就回覆，會適時公布新任行政總裁人選。
叫Mochi？雞蛋仔？齋啡？
講番3隻狐獴BB，佢哋有唔同性格，一隻鍾意叫喊、一隻鍾意同護理員互動，另一隻就內向少少，會成日黐住啲年長孤獴。海洋公園幫佢哋諗咗3組名，第一組係以英文字母M開頭，配合番佢哋媽媽Mata嘅名，分別叫「Magic(魔法)」、 「Mirror(鏡)」、「 Mochi(糯米糍)」；另一組係因為覺得佢哋可愛又軟綿綿咁，就諗起啲香港特色小食，叫「雞蛋仔」、「糖葱餅」、「白糖糕」；仲有因為佢哋嘅毛色啡啡哋，園方亦建議可以叫「茶走」、「齋啡」、「鴛鴦」。
如果有興趣幫狐獴BB改名嘅話，6月28日晏晝6點前都可以去海洋公園facebook專頁投票，最多人揀嘅嗰組名就會成為佢哋以後嘅名字啦。
更多港聞
【Emily】鄧竟成做YouTuber 大談國安法
【明報專訊】近期唔少建制派加入YouTuber行列，前警務處長、政協鄧竟成近日都開咗YouTube頻道「成中話題」，同一名自稱嘭sir嘅建制... 詳情
【明報專訊】第13屆香港文學節喺中央圖書館展開，揭幕活動係「字旅．時光」專題展覽。展覽噚日起到下個月12號喺中圖展覽館舉行，分為「賞．自然」...
詳情
相關新聞
