【Emily】612基金剩3000萬 籲市民捐款

【明報專訊】上年成立、支援因反修例風波被捕、受傷等抗爭者嘅「612人道支援基金」，前晚公布截止3月31號嘅工作簡報，基金成立至今共籌得超過1.1億元，目前已經用咗逾6900萬，仲有大約3000萬可用。基金話過去一個月餘額下降近四成，因需要支援嘅案件急劇上升，希望大家再捐款支持。

至今支援逾萬人次

法律開支佔最多

基金話截止3月31號，已向12,008人次提供支援，包括醫療費用、情緒支援費用、緊急經濟援助、法律費用、借出保釋金同埋還押者物資費用等，當中法律費用資助佔最多，開支達2318萬元；其次係緊急經濟支援或撫恤金，開支為1930萬元；醫療費用開支則約372萬元。

另外，基金至1月聘有21個職員，由去年6月至今年1月嘅薪酬開支為190萬元。服務人次方面，24%係有關緊急經濟支援、還押支援等，21.2%用於法律費用資助，7.9%用於醫療費用支援。

基金話感謝大家支持同關注，會繼續緊守崗位，為反修例運動嘅傷者、被捕者、被告，提供人道支援。