233場巡唱香港落幕 勁掙幾億 張學友「失業」落淚 望快搵新工
【明報專訊】張學友於紅館舉行的15場《學友·經典 - 香港站·再見篇》演唱會，前晚最後一場，亦是他整個巡迴演出的第233場，打破個人紀錄。他開心說：「希望下次再開個唱，能打破番自己紀錄！」不過歷時2年多的巡演結束，學友感到不捨，在尾聲時忍不住落淚，他希望不久將來帶來更好的演出。這晚他的大女瑤華坐第一行，開心跟爸爸握手。學友說今次演出最大收穫是瑤華變了他的粉絲，父女多了話題。完騷後，學友感覺自己失業有失落感，不知明天做什麼？希望盡快搵到工作。有指他巡唱勁袋幾億元？學友笑說：「講錢失感情！」
學友紅館尾場演唱會吸引大批圈中好友捧場，包括劉嘉玲、舒淇、鍾鎮濤與太太范姜、吳婉芳、狄波拉、許瑋甯等。學友大女張瑤華幾乎晚晚捧場，這晚更坐在第一行，投入邊聽邊跟着唱。握手環節時，她還化身小粉絲跟爸爸握手。
57歲跳舞好過35歲
張學友笑言好多觀眾想睇尾場演出的想法好傻：「大家期望有10次安哥，是不會，因為我的演出好固定，大家要知我唱到233場，你覺得我攰唔攰呢？我都會好搏命，最少我不會唱得少過昨日，今晚唱多4句英文歌詞，抵過昨日！」
學友提到自己已57歲，但跳舞好過35歲：「相信再過10年、20年，會跳得仲好！」他又問有無觀眾是第一次欣賞其個唱，然後自我介紹說：「我是1984年參加歌唱比賽入行，已經35年了，大概開過800場演唱會，若然有觀眾第一次聽我個唱，我好驚訝，有新客都好 ，代表下次又多些客人來睇我演唱會。」
學友在尾聲時，不忘多謝家人過去2年幾的容忍和支持。當講到不捨得個唱結束，他不禁落淚說：「我不捨得，但亦是自己叫停的。唱歌是我這生人最鍾意，叫停，是因為想進步，不想停在這階段。其實我好想同團隊一直表演下去，但我已57歲，過幾年60歲，不知仲可以有幾多進步，我答應大家在不久將來，帶出更好演出，多謝一直支持張學友的朋友，希望過10年再開個唱都見到你們。」演唱會於11點半結束。
花籃錢變善款籌110萬
完騷後，學友於後台進行遞交支票儀式，將親友、歌迷省卻的買花籃錢撥捐慈善，共籌得110萬元。學友表示過去2年幾做巡迴個唱，非常順利、好彩，過程一點都不容易，要避過風雨、冷與熱，而且能夠將演出原汁原味帶到海外，感謝主辦商支持，這個巡迴騷亦是歷年最開心和滿意的，但想到明天便失業，有種失落感。他說：「過去2年幾機械式的飲食、鍛煉、練歌、做騷，現在不知明天瞓醒做什麼，我個人不太懂得去玩，身好痕，要搽敏感膏，哈哈！暫時休息先，不知唞到幾時，交返個人畀屋企先，希望盡快搵到工作。」
大女變粉絲捧足10幾場
他透露老婆羅美薇有來睇騷，但低調坐在控制台，細女之前都看過5、6場，這次演出最大收穫是大女瑤華變粉絲，捧足10幾場，父女間多了話題，但瑤華不愛表演，只當唱歌是興趣，入行發展機會低。之前學友講過想做音樂劇，他指自己講了好耐，希望盡快實行，但對他好大難度：「 演唱會我容易搵班底，音樂劇不是自己範疇，要找人寫古仔、寫歌，要靠人是很難的事，有時傾半年都未達到心水，自己的構思又好屎，之前試過推倒3、4次。」提到他巡迴個唱，應該勁袋幾億元？學友笑笑口避談：「講錢失感情呀！」
記者：鍾一虹
攝影：鍾偉茵
■更多娛樂猛料 ﹕ol.mingpao.com
做Twins旅行電燈膽 容祖兒終認與劉浩龍分手
【明報專訊】容祖兒與劉浩龍的戀情一直撲朔迷離，雖然傳出「分訊」多時，但他們一直未肯正面回應。劉浩龍開演唱會，祖兒高調撑場。去年中祖兒生日搞遊... 詳情
