鄭宇碩為健康辭華人民主書院董事
[2018.12.15] 發表
【明報專訊】主張推動華人社會民主發展嘅「華人民主書院」噚日發表聲明，公布本身係董事嘅鄭宇碩教授因為健康原因，辭任董事一職。Emily致電想關心吓教授嘅身體，佢就話唔想公開討論私人健康問題，只係話希望唞多啲、可以陪吓屋企人咁話。
華人民主書院過往不時被親中報章指控勾結外國勢力，問到呢啲報道同今次請辭有冇關係，鄭教授只係大笑話「砌都砌完啦」、「見吓外國人又話勾結，建制派都去見啦」，似乎對有關報道睇得好開。
鄭教授另外亦係負責幫DQ案、佔中九人案籌款嘅「守護公義基金」信託人，佢噚日就同Emily講，已經辭埋基金嘅職務，原本諗住等搵到新嘅信託人、同埋對方答應後先一同公布。
鄭教授過往持續代表基金發言，交代籌款數字，辭任擔唔擔心會影響基金？佢就大笑話「點會有咩影響？」佢強調大家都係義工幫吓手，相信第二個做一樣咁叻。Emily喺呢度都祝福鄭教授身體健康、早日康復。
更多港聞
【明報專訊】民建聯立法會議員鄭泳舜（Vincent）3月先循九龍西補選晉身立法會，佢一直都好關心房屋議題。新成立嘅「跟進本地不適切住屋問題及...
詳情
相關新聞
