葉劉撐慢必 話政府毋須提一男一女婚姻
[2018.10.16] 發表
【明報專訊】《施政報告》提到政府致力「在維護現有一男一女、一夫一妻的婚姻制度的基礎上」，促進不同性傾向同跨性別人士嘅平等機會。一直推動同志平權嘅人民力量陳志全(慢必)噚日喺立法會政制事務委員會上，對政府提到要維護一男一女婚姻制度感到失望，話對性小眾而言係「落咗閘」；新民黨主席葉劉淑儀與慢必同一陣線，同意對方說法，指政府唔需要提及「維護現有一男一女嘅婚姻制度」，質疑政府咁寫係怕得罪傳統人士。
倡政府教導教育界人士
葉太形容，傳統一男一女終身結合喺現今社會已受到好多衝擊，但唔關性小眾事，好似「終身」結合、冇第三者都唔係有好多人做到。葉太講呢番說話時，得到慢必拍手支持。葉太續稱，不同性傾向唔係病，相反政府應教導教育界人士，唔好當不同性傾向係病、唔好歧視性小眾。
一直提倡捍衛傳統家庭核心價值嘅經民聯梁美芬就支持政府，讚呢段文字寫得好。佢話，自己坐喺消除歧視性小眾諮詢小組入面，聽過激烈討論，認為反對性傾向歧視唔使立法，應該用行政資源、自願約章，又擔心反對同性戀嘅人會受到逆向歧視。
政制及內地事務局長聶德權回應話，施政報告只係道出事實，目前係一男一女嘅婚姻制度，政府會喺呢個基礎上推動平等機會；政府會提供培訓資源，令不同界別、會喺工作上接觸到性小眾嘅人，包括教育界，提高議題敏感度，避免不適當處理同歧視。
更多港聞
與台北故宮合作 配合AR技術 城大動物展活現古地圖噴水魚
【明報專訊】欣賞古時描繪動物的畫作，往往需要一些聯想力，始終古人對動物的理解或與現今不同，香港城市大學與台北國立故宮博物院合作舉行展覽，利用... 詳情
相關新聞
