基辛格約傾偈 陳啟宗：想聽點睇貿戰
[2018.08.15] 發表
【明報專訊】中美貿易戰愈演愈烈，香港明天更好基金執行委員會主席、恒隆集團董事長陳啟宗好關心呢件事，仲話佢老友、美國前國務卿基辛格啱啱聯絡佢，約佢下個月去美國見面傾偈。基辛格係中國通，陳啟宗話希望聽?佢老人家睇法，亦希望說服對方接受佢嘅觀點。陳啟宗話，中美貿易戰咁搞落去，邊個係贏家好難講，但好大機會兩敗俱傷。
話美國贏都肯定捱幾拳
陳啟宗好生動咁形容中美貿易摩擦，更自嘲身高作比喻，話自己身材矮細，如果同拳王打，梗係唔夠人打。佢形容美國係7呎2吋巨人，中國以前細隻啲，𠵱家強大咗，都有7呎高，如果兩個打起嚟，就算美國人打贏都肯定捱幾拳，都會好傷，話美國總統特朗普玩貿易戰好不智。
陳啟宗上月同基金會成員訪美，拜會智庫、商界及政府部門，成員之一嘅伍穎梅就話，前一年去美國交流，政商界對中國態度還可以，但今年再去見當地領袖，唔少人都對中國持負面態度；唔少人以前不滿特朗普，𠵱家都改為支持佢。
早前美國有傳媒話，同中國關係一向好好嘅基辛格曾向特朗普提出「聯俄制華」戰術，陳啟宗就話唔係好信基辛格會咁講，佢話基辛格都係智者，而佢有機會都想去聽?對方點睇貿易戰。
更多港聞
相關新聞
