【明報專訊】 噚日(6月7日)對民主黨尹兆堅、新民黨容海恩同民建聯周浩鼎3名立法會議員而言，係特別日子，Emily並非講緊佢哋要審議高鐵一地兩檢草案，而係3人都「牛一」。不過一地兩檢呢項法案太困身，3個壽星仔女噚晚都要喺會議廳坐定定，生日都同一地兩檢分唔開。 49歲嘅尹兆堅話生日願望係希望一地兩檢通過唔到，不過草案勢將喺建制派支持下通過，呢個願望係咪有啲不切實際呢？阿尹就話即使世界和平做唔到，啲人都會祈求世界和平。佢噚晚開會後返屋企做廿四孝老竇，幫仔女為考試做準備。41歲嘅容海恩噚日同議辦同事慶祝，生日願望就年年一樣，希望自己同家人身體健康。 39歲壽星仔周浩鼎笑言40歲係不惑之年，所以自己仲係「惑緊」。佢話生日願望係想仔女快高長大、健康幸福，形容為人父母一定係許呢個願，被困立法會嘅佢亦希望一地兩檢通過，講笑話噚日嘅額外禮物就係議會響起點算法定人數嘅鐘聲。
|
| |
| |
;)
