【明報專訊】立法會一地兩檢條例草案委員會早前向內務委員會提交報告，建制同泛民主派都分別有議員就報告提出意見，竟然不約而同涉及大律師公會。身兼律師嘅何君堯建議喺報告內，要加幾句「香港大律師公會並沒有內地法律專業資格，特別是對中國憲法缺乏專業的認知」，話公會批評一地兩檢條例草案違法違憲係無根據。 何君堯去信委員會主席葉劉淑儀，希望報告內可以加上述字句，認為大律師公會對中國憲法缺乏專業認知，因此公會「不能否定」全國人大常委會嘅決定係條例草案嘅憲制基礎。何早前喺一地兩檢條例草案委員會都曾經質疑大律師公會，25個理事都無人有內地執業律師資格，覺得公會對草案嘅批評好薄弱。 其實，大律師公會對一地兩檢嘅意見，都係針對《基本法》條文去提出，而唔係根據內地憲法去評論。 另一邊廂，公民黨話報告雖然有政府同議員雙方面嘅意見，但批評報告內容大篇幅陳述政府嘅立場，而只係簡短描述議員意見，特別忽略咗議員對一地兩檢係咪合憲嘅質疑，公民黨建議喺報告內加入大律師公會對一地兩檢提出過嘅兩份建議書。
|
| |
| |
;)
