【明報專訊】廣播處長梁家榮獲政府續任3年，新任期由今年8月開始生效。梁𠵱家65歲，如完成新任期將屆68歲。香港電台報道，梁家榮未來日子會努力改善同事嘅工作環境，以及履行公共廣播機構嘅使命。 梁﹕努力改善同事工作環境 港台工會就話，喺梁家榮任內未有解決「土地問題」，指新大樓發展降級、硬件老化、錄音同錄影棚唔夠，嚴重影響工作環境；亦指港台早前煞停社交媒體事件，證明佢唔了解新媒體生態，亦對同事缺乏信任。工會希望梁家榮可以堅持公共廣播嘅原則，遇到不平、不公之事時，會挺身維護同事權益。 梁家榮喺2015年8月獲政府委任為廣播處長，商務及經濟發展局發言人噚日話，政府按既定聘任程序處理廣播處長續約事宜，是次同梁家榮續訂合約，由8月7日起生效，為期3年。 港台報道指梁家榮日後會繼續與同事保持良好溝通，並繼續合力履行公共廣播機構嘅使命，用專業態度服務市民；梁亦會善用資源，配合媒體融合大趨勢，進一步推動廣播發展；同時，港台今年會製作一系列香港廣播90周年嘅項目，傳承香港廣播嘅歷史同文化。 港台工會回應話，梁家榮任內無顯著爭取資源，令港台追唔上服務擴展步伐，期望處長堅持公共廣播嘅原則，展現對香港電台長遠發展嘅承擔。
|
| |
| |
;){kind=small}
;)
